For di awe, organisashonnan kultural i kreadornan na Aruba, Boneiru, Kòrsou, Saba, Sint Eustatius i Sint Maarten por akudí na rijkscultuurfondsen.org. E wèpsait nobo akí ta un guia kla pa e seis fondonan di kultural di reino, na unda por haña un selekshon di posibilidatnan di supsidio.
Dikon rijkscultuurfondsen.org?
E wèpsait a nase den kombersashon ku kreadornan kultural i organisashonnan riba e islanan ABCSSS. For di kombersashonnan, bishitanan di trabou i interkambionan e idea a nase pa establesé un lugá digital kaminda kreadornan i organisashonnan por haña fásilmente un fondo adekuá i areglonan di supsidio korespondiente. Rijkscultuurfondsen.org ta un plataforma sentral ku ta guia petishonarionan paso a paso na e posibilidatnan ku ta pas mas mihó ku nan plannan kultural.
Haña e supsidio adekuá den 2 stap
Un di e funshonnan mas importante di e wèpsait ta e ayudo digital pa petishon; un hèrmènt pa filtra, trahá na midí, ku kual e usuario ta mira den dos stap e areglonan ku ta pas mas mihó ku su plannan kultural. Ademas, e wèpsait ta ofresé resúmennan di un selekshon di areglonan di supsidio pa kada fondo, ofresé den kuater idioma: ingles, papiamentu, papiamento i hulandes. Unabes ku bo a filtra e areglo ku ta pas mas mihó ku bo plannan, bo ta wòrdu referí na e wèpsait di e fondo korekto.
Seis fondonan di kultura di reino
E wèpsait ta wòrdu manehá na nòmber di e seis fondonan di kultura di reino: Nederlands Filmfonds, Fonds Podiumkunsten, Fonds voor Cultuurparticipatie, Mondriaan Fonds, Nederlands Letterenfonds i Stimuleringsfonds Creatieve Industrie.
E fondonan akí, finansiá dor di ministerio di Enseñansa, Kultura i Siensia (OCW), ta duna sosten finansiero na organisashonnan kultural i kreadornan den henter Reino. Huntu nan ta finansiá tur disiplinanan kultural: arkitektura, kultura digital, diseño, arte visual, patrimonio, pelíkula, literatura, artenan di riba tarima i partisipashon i edukashon kultural.
Pa kreadornan den henter Reino
E fondonan di kultura di reino ta dediká nan mes na hasi arte i kultura aksesibel pa tur hende, na Hulanda Oropeo i Hulanda Karibense. Nan ta stimulá inovashon, desaroyo di talento i konekshon entre kreadornan, organisashonnan i públiko den henter Reino.
Bishitá rijkscultuurfondsen.org i deskubrí kon e fondonan di kultura di reino por yuda bo hasi bo plannan kultural posibel.
Notisiero
Bo ke risibí informashon tokante e wèpsait akí regularmente? E ora ei registrá pa e notisiero na ingles.
